एचआइभी सङ्क्रमित बालबालिकाले मासिक भत्ता

         १३ चैत, पर्वत । एचआइभी/एड्सबाट सङ्क्रमित बालबालिकालाई पनि पर्वतमा मासिक रूपमा भत्ता दिइने भएको छ । एचआइभी सङ्क्रमित बालबालिकालाई जीवनयापन र अध्ययनमा सहयोग पुगोस् भन्ने उद्देश्यले मासिक रूपमा एक हजार रुपैयाँ भत्ता दिन लागिएको हो । सङ्क्रमित १८ वर्षभन्दा मुनिका बालबालिकाले अनुदान पाउनेछन् । एचआइभी सङ्क्रमित बालबालिकाका लागि संरक्षण तथा स्याहार गर्न र उनीहरूको क्षमता विकासका लागि अनुदान दिन लागिएको जिल्ला एड्स समन्वय समितिका अध्यक्ष तथा स्थानीय विकास अधिकारी कृष्णप्रसाद शर्माले बताए । ‘अनुदान पाएपछि सङ्क्रमित

बालबालिकाको दैनिक जीवनयापन सहज हुनेछ’, उनले भने-’यस्तो अनुदानको निरन्तरता हुन आवश्यक छ ।’ एचआइभी सङ्क्रमित बालबालिकाका धेरैको अभिभावकको मृत्यु भइसकेको हुनाले शिक्षा आर्जन र दैनिक जीवनयापनसमेत कठिन हुँदै आएको छ । पर्वतमा अहिलेसम्म नियमित रूपमा एचआइभी प्रतिरोधात्मक औषधि (एआरटी) सेवन गर्दै आएका चारजना बालबालिका मात्रै रहेको कम्युनिटी सपोर्ट ग्रुप पर्वतका कार्यक्रम संयोजक यज्ञप्रसाद अधिकारीले बताए । ग्लोबल फन्डको सहयोगमा सेभ द चिल्डे्रनमार्फत कम्युनिटी सपोर्ट ग्रुपले पर्वतमा अनुदान वितरण गर्ने जिम्मा पाएको छ । एचआइभी सङ्क्रमित बालबालिकाको लगत लिनका लागि जिल्लाका सञ्चारमाध्यमबाट सार्वजनिक सूचनाबाट आहृवान गरिने र त्यसकै आधारमा अनुदान वितरण गरिने भएको छ ।