चेन्नाइले कमायो सय करोड, सलमानका रेकर्ड ओझेल परे

                   बलिउडका वादशाह भनेर कहलिएका नायक साहरुख खानको निर्माणमा बनेको चलचित्र ‘चेन्नाई एक्सप्रेस’ले बक्स अफिसमा नयाँ इतिहास रचेको छ । 

                   यो चलचित्रले विश्वभर नयाँ किर्तिमानी रेकर्ड राख्दै बलिउडका अन्य कलाकारलाई धेरै नै पछि पारेको छ ।आफ्नो प्रीभ्यू शो मा नै ६.७५ करोडको व्यापार गर्दै रेकर्डको सुरुवात गरेको साहरुखको चेन्नाईको गती रोकिएको छैन । चलचित्रले शुक्रबार सलमान खानले बनाएको ३२ करोडको ओपनिङ कलेक्शनलाई समेत पछि पार्दै ३३.१२ करोड कमाएको थियो । यस्तै चलचित्रले शनिबार ‘रा वन’ले बनाएको २५ करोडको कलेक्शनलाई समेत पछि पार्दै २८.२५ करोडको व्यापार गरेको हो । आइतबार चलचित्रले ३२.५० करोडको व्यापार गर्दै सबैभन्दा चाडो एक सय करोडको व्यापार गर्ने सिनेमाको सूचिमा आफूलाई अगाडी उभ्याएको हो ।

                यसअघि चलचित्र ‘दबंग २’ ले वीकेन्ड कलेक्शनमा सबैलाई पछि पारेको थियो । यस्तै सलमान खानले अभिनय गरेको ‘एक था टाइगर’ले ५ दिनमा १ सय करोडको क्लब छोएर रेकर्ड बनाएको थियो । तर बलिउडका वादशाह साहरुखको नयाँ चलचित्र ‘चेन्नाई एक्सप्रेस’ले यो रेकर्डलाई पनि धेरै पछि पारेको छ ।

             यो चलचित्रले सोमबार १२.६२ करोडको व्यापार गरेको छ । सोमबारसम्म चलचित्रको कलेक्शन ११३.०४ करोड पुगेको छ । भारतिय बक्स अफिसमा धमका मच्चाइरहेको यो चलचित्रले ओभरसिजमा पनि कमाल मच्चाउदै नयाँ रेकर्ड बनाइरहेको छ ।

                 चलचित्रले पहिलो तिन दिनमै ओभरसिजमा ५०.४७ करोडको व्यापार गरेको छ । चलचित्रले ओभरसिजमा पनि १ सय करोडको क्लबलाई छुने अनुमान गरिएको छ । यतिबेला विश्व बजारमा साहरुख र नायिका दीपिका पादुकोणको जादु चलिरहेको छ । रोहित सेट्टीको निर्देशनमा बनेको यो चलचित्रको व्यापारले अगष्ट १५ देखि प्रदर्शनमा आउन लागेको चलचित्र ‘वन्स अपन अ टाइम इन मुम्बई दोबारा’लाई समेत असर पार्ने देखिएको छ । अगष्ट १५ भारतमा राष्ट्रिय विदा पर्ने भएकाले पनि ‘चेन्नाई एक्सप्रेस’को दोश्रो साताको कलेक्शन उत्कृष्ट हुने अड्कल लगाइएको छ ।