अख्तियारले थाल्यो साक्षर अभियानको अनुसन्धान

        ३ असार, महोत्तरी । साक्षरता कक्षा सञ्चालनमा अनियमितता भएको भन्दै अख्तियार दुरुपयोग अनुसन्धान आयोगलगायत तीनवटा निकायले अनुसन्धान सुरु गरेको छ । जिल्ला शिक्षा कार्यालय महोत्तरीद्वारा सञ्चालित साक्षरता अभियान कक्षा सम्बन्धमा अख्तियार दुरुपयोग अनुसन्धान आयोग, राष्ट्रिय सतर्कता केन्द्र र शिक्षा विभागको अनौपचारिक शिक्षा केन्द्रले अनुसन्धान सुरु गरेको हो । ती निकायहरुले जिल्ला शिक्षा कार्यालयमा पत्राचार गरी २४ घण्टाभित्र कक्षा सञ्चालन भएको/नभएको यथार्थ विवरण र रकम निकासा सम्बन्धमा के कति रकम निकासा भएको हो भन्ने प्रतिवेदन पेस गर्न निर्देशन दिएको छ । जिल्ला शिक्षा कार्यालय र सामाजिक सङ्घसंस्थाका अगुवाले साक्षरता अभियानलाई कागजमै सीमित बनाएर करिब एक करोड ३९ लाख रुपैयाँ दुरुपयोग गरेका छन् । सदरमुकाम जलेश्वर र १६ गाविसमा साक्षरता कक्षा सञ्चालनका लागि ३७ वटा सामाजिक सङ्घसंस्थासँग शिक्षा कार्यालय महोत्तरीले

सम्झौता गरे पनि अनुगमनका क्रममा ९० प्रतिशतभन्दा बढी स्थानमा कागजमै सीमित रहेको पाइएको छ । शिक्षा कार्यालयले वैशाखदेखि तीन महिनाका लागि सञ्चालित अभियानमा १५ देखि ६० उमेर समूहका २६ हजार निरक्षरलाई साक्षर बनाउने लक्ष्य रहेको जनाए पनि मुस्किलले ५ सय जनाले साक्षरताको अवसर पाएको अनुमान छ । जिल्ला शिक्षा अधिकारी रनदीप बस्नेतले जिल्लामा यस वर्ष विगतको तुलनामा सुधारोन्मुख अवस्था रहेको बताए । सन् २०१५ सम्म सबैलाई साक्षर बनाउने राष्ट्रिय अभियान जिल्लामा पूरा नहुने देखिएको छ । त्यसका लागि आएको बजेट भागबन्डा र सरोकारवालाको हेलचेक्रयाइँले अभियान असफल हो । रासस