संघियता नल्याउन स्थानिय निकाय निर्वाचनको कुरा गरिँदैछ : उपाध्यक्ष गजुरेल

                 बैशाख;२ – नेकपा–माओवादीका उपाध्यक्ष सिपी गजुरेलले सङ्घीयतालाई पाखा लगाउनका लागि स्थानीय निकायको निर्वाचन गर्ने तयारी गरिएको आरोप लगाएका छन् । नेकपा–माओवादी अछामको जिल्ला सम्मेलन सकेर यहाँ आएका उपाध्यक्ष गजुरेलले पत्रकारसँग कुरा गर्दै यस्तो आरोप लगाएका हुन् । वर्तमान सरकारले सङ्घीयता नचाहेकाले संविधान निर्माणभन्दा पहिला स्थानीय निकायको निर्वाचन गर्न लागेको उनले बताए । गाउँ विकास समिति र जिल्ला विकास समितिको क्षेत्राधिकार कति हुने भन्ने संविधानमै उल्लेख हुने भए पनि पहिले नै स्थानीय निकायको निर्वाचन गर्ने तयारीले शङ्का उब्जिएको उनको भनाइ थियो । एक फरक सन्दर्भमा उपाध्यक्ष गजुरेलले एमाओवादीसँग अहिलेको अवस्थामा एकता हुनै नसक्ने बताए । आफूहरुसँग एमाओवादीको कार्यदिशा अलिकति पनि

नमिल्ने उनको भनाइ थियो ।