दुई नेताको प्रेम विवादमा अल्झियो सद्भावना

          काठमाडौ असार ९ – मधेशवादी दलबीचको एकीकरणको चर्चा सलाएको अवस्थामा सद्भावना पार्टीभित्र एक जोडी नेताको प्रेमले चर्चा पाएको छ । सद्भावना पार्टीका केन्द्रीय सदस्य एवं प्रवक्ता सन्तोष मेहता र सोही पार्टीका भातृसंगठन विद्यार्थी मञ्चका महासचिव चुनी खातुनबीचको प्रेम सम्बन्धले यतिखेर पार्टीमा मात्र होइन मधेश राजनीतिमा नै चर्चा पाएको छ । करिब पाँच वर्षदेखिको प्रेम सम्बन्ध अहिले आएर मात्र चर्चामा आउनुको कारण दुई जनाबीच विहेको कुराले भएको झगडा हो । कागजी रुपमा विहे गरेर काठमाडौमा प्रायः सँगै बस्ने कतै जाँदा सँगै जाने गर्दै आएका प्रवक्ता मेहताले अहिले आएर चुन्नीसँग विहे नगर्ने भनेपछि दुईबीचको विवाद बाहिर आएको हो । स्वयं दुईजनाले आपसमा सम्झौता गरी कागजी विवाह गरी श्रीमान् श्रीमती भएर अमेरिका भ्रमण समेत गर्न भ्याएका यी जोडीबीच अहिले आएर तनाव शुरु भएको छ । सद्भावना पार्टी स्रोतका अनुसार प्रवक्ता मेहताले चुन्नी खातुनसँग नै विहे गर्ने भनिरहेका थिए तर उनको परिवारले स्वीकृति नदिएपछि

चुन्नीलाई छाडेर धनुषाका आफ्नै जातका केटीलाई विहे गर्ने भनि ठिक पारेर राखेका छन् । धनुषाका केटीसँग विहे गर्ने कुरा अन्तिम चरणमा पुगेको थियो तर सो कुराको सुइको पाएपछि चुन्नीले मेहतालाई कानुनी उपचार खोज्ने चेतावनी दिएपछि मेहताको विहेमा अवरोध उत्पन्न भएको छ । स्रोतका अनुसार चुन्नी खातुनले आफना पार्टीका अध्यक्ष राजेन्द्र महतोलाई भेटी मेहताले आफूसँग विहे गरेको प्रमाण रहेको जानकारी गराएका थिए । उनले न्याय दिलाई दिनका लागि अध्यक्ष महतोलाई गुहारेपछि आफ्ना पार्टीका प्रवक्ता मेहतासँग कुरा गरेका थिए तर त्यो कुराले कुनै टुगों नलागेको पार्टी स्रोतले जनाएको छ । मेहतासँग आफ्नो विहे नभए कानुनी उपचारमा जाने त्यहाँबाट पनि न्याय नपाए आत्महत्या गर्नेसम्मको कुरा आफ्ना निकट नेताहरुसँग चुन्नीले भनेका छन् । यता नेता मेहताले पनि चुन्नीलाई विर्सन सकेका छैनन् । उनले पनि चुन्नीलाई नै सम्झेर बसेका छन् तर परिवारले साथ नदिएपछि उनी पनि विरक्तिएको स्रोतको दाबी छ । आफ्नो फेसबुक वालमा जहिले पनि राजनीतिक विचार र घटना पोस्ट गर्ने मेहता अहिले आएर श्रृगांर रसका विभिन्न सायरी गीतहरु पोस्ट गरिरहेका छन् । यी जोडी सुनसरीकै हुन् । चुन्नी मुसलमान र मेहता हिन्दु भएका कारणले मेहताको परिवारले चुन्नीलाई स्वीकार नगरेको हो । चुन्नीले मेहता र उनका परिवारलाई धम्की दिएपछि मेहताले गर्ने विहेपनि अवरुद्ध भएको छ । स्रोतले भने अहिले ती जोडी सुनसरीमै छन् र सामाजिक रुपमा त्यसलाई मिलाउने प्रयास भइरहेको छ । यस विषयमा चुन्नी खातुनसँग सम्पर्क गर्दा उनले मेहतासँगको सम्बन्ध बिग्रेको भन्दा पनि अरुले यस सम्बन्धलाई लिएर नकारात्मक टिप्पणी गरेको भएर उजुरी गरेको बताएकी छिन् । ‘हामी दुईको लामो समयदेखि राम्रो सम्बन्ध थियो । अहिले सन्तोष सरको विवाह हुन लागेपछि अरुले मलाई अपशब्द प्रयोग गर्दै फोन गर्न थालेपछि मैले उजुरी दिएको हुँ,’ खतुनले भनिन् । आफूले गरेको उजुरीको बारेमा पार्टीका शीर्ष नेताहरु सकारात्मक रहेको र यसबारे आफूले न्याय पाउने बताइन् । यस विषयमा मेहतासँग सम्पर्क गर्न खोज्दा उनको नम्बर स्वीच अफ गरिएको पाइयो ।