मैले अध्यक्षको उमेदवारी घोषणा गरेको छैन : माधव नेपाल

              २४  जेठ, इटहरी । काठमाडौंस्थित नेपाल प्रज्ञा प्रतिष्ठानमा औपचारिक कार्यक्रमै गरेर पार्टी अध्यक्षको उम्मेद्वारी घोषणा गरेका एमाले नेता माधवकुमार नेपालले शुक्रबार सुनसरी पुगेर आफूले अध्यक्षको उमेदवारी घोषणा नगरेको बताएका छन् । एमालेनिकट नेपाल खेलकुद महासंघको पूर्वाञ्चल स्तरीय खेलकुद भेला तथा प्रशिक्षणमा सहभागी हुन इटहरी आएका नेता नेपालले पत्रकारहरुसँगको प्रतिक्रियामा नयाँ पुस्ताको नेतृत्वका लागि आफू खुला रहेको बताए । नेता नेपालले नेतृत्वका लागि व्यक्तिलाई प्राथमिकता नदिन आग्रह गर्दैर् नीति र जनअपेक्षालाई केन्द्रविन्दुमा राखेर आवश्यकता मूल्यांकन गर्नुपर्नेमा जोड दिए । आफ्नो सवालमा नेतृत्वको कुरा गौण विषय भएको भन्दै उनले नीति, पार्टी एकता, आगामी कार्ययोजना र जनताको अपेक्षा ठूलो कुरा भएको बताए । नेता नेपालले अरुको बद्ख्वाइँ गर्ने कुरालाई आफूले कहिल्यै प्राथमिकता नदिएको भन्दै नेता केपी शर्मा ओलीलाई आफूले रोगी नभनेको दाबी गरे । जिल्ला-जिल्लाबाटै आफूहरुले स्वस्थ प्रतिस्पर्धालाई प्राथमिकता दिएको उनको भनाइ थियो । तर, गुटगत राजनीतिले भने राम्रो सन्देश नजाने भन्दै उनले मिलेर जानुको विकल्प नभएको बताए ।