अमेरिकाद्वारा रसियालाई सैनिक सहयोग बन्द

             किभ, फागुन २० (एजेन्सी) अमेरिका र रसियाकाबीचमा हुँदै आएको सैनिक सहयोग र आदानप्रदान सम्बन्धी कार्य अमेरिकाले स्थगित गरेको छ ।हालैमात्र युक्रेनमा भएको विद्रोहपछि युक्रेनको क्रिमियाली प्रायद्वीपमा रसियाले सेना पठाएको भन्दै अमेरिकाले एकतर्फी रुपमा सो सैनिक सहयोग र समन्वयको काम बन्द गर्ने बताएको हो । सोमबार राति अमेरिकी रक्षा मन्त्रालयले सो जानकारी गराएको हो । अमेरिकी रक्षा मन्त्रालयका प्रवक्ता रियर एडमिरल जोन किर्बीले सोमबार प्रकाशन गरेको विज्ञप्तिमा सो जानकारी दिइएको छ । उहाँको सो विज्ञप्तिमा भनिएको छ – अमेरिका र रसियाली

सैनिकका बीचमा हुँदै आएको सहयोग र समन्वयको काम बन्द गरिएको छ । युक्रेनको क्रिमिया प्रायद्वीपमा हालै रसियाले गरेको सैनिक हस्तक्षेपको विरोध गर्दै अमेरिकाले सो सैनिक समन्वयको काम हालका लागि स्थगित गरेको समाचारमा जनाइएको छ । युक्रेनमा रसियाले सेना पठाउनु युक्रेनको सार्वभौमिकता र स्वतन्त्रतामाथिको हनन भएको विश्व समुदायमा बताइएको छ । यस विषयमा रसियाले भने पछिल्ला दिनमा कुनै प्रतिक्रिया दिएको छैन । साथै युक्रेनले पनि क्रिमियामा अशान्ति भएको निहँुमा रसियाले आफ्नो देशको स्वतन्त्र अस्तित्वमा नै धावा बोलेको भन्दै त्यसको कडा शब्दमा विरोध गरेको छ । युक्रेनमा हालै भएको विद्रोहपछि भागेका राष्ट्रपति भिक्टोर यानुकोभिचले युक्रेनको नयाँ नेतृत्वलाई मान्यता नदिन आग्रह गरेलगत्तै युक्रेनको क्रिमिया प्रायद्वीपमा हतियारधारीहरुको हमला सुरु भएको हो । रसियाको संसदले युक्रेनको क्रिमिया क्षेत्रलाई बचाउनका लागि रसियाली राष्ट्रपति भ्लादिमिर पुटिनलाई जस्तोसुकै उपाय अबलम्बन गर्न पनि अधिकार दिएको थियो । केही दिन अघि दिइएको सो अधिकारका आधारमा सेना पठाउन लागिएको हो । युक्रेनमा गत साता विद्रोह भएको थियो । सो विद्रोहबाट पूर्व राष्ट्रपतिलाई हटाइएको थियो । विपक्षीहरुले संसद कब्जा गरी सो निर्णय गरेका थिए । हाल त्यहाँको राजनीतिक अवस्था अस्थिर रहेको छ । तर त्यहाँ भएको हतियारधारीहरुको आक्रमण रसियाको सहयोगमा भएको युक्रेनले बताउदै आएको छ । विश्व समुदायले युक्रेनको पछिल्लो विद्रोहले विश्व राजनीतिमा नै तरङ्ग ल्याएको बताएका छन् । यसैबीच युक्रेनमा जारी रहेको यस विवादकै बीच अमेरिकी विदेश मन्त्री जोन केरी मङ्गलबारै युक्रेन जान लागेका छन् । उनले मङ्गलबारै युक्रेनको भ्रमण गर्न लागेको अमेरिकी विदेश मन्त्रालयले जानकारी दिएको छ । भ्रमणको समयका बारेमा भने केही जानकारी दिइएको छैन ।