सरकारको मुख ताक्ने प्रबृतिलाई म्याग्दीका जनताको गतिलो झापड '

               म्याग्दी,फागुन २४–सार्वजनिक काम गर्न अग्रसरता देखाउनु त परै जाओस,राज्यले आफ्नो ढुकुटीबाट छुट्याएको रकममा समेत अनियमितता गरेर मोटाउने प्रबृति बढिरहेका बेला म्याग्दीका स्थानियबासीहरुले भने नमुना काम गरेका छन् । विकास निर्माणका लागि सरकारको मुख ताकेर बस्ने र त्यसमा पनि गम्भिरता पुर्वक नलाग्ने प्रचलन हावी भइरहेका बेला म्याग्दीका जनताले आफ्नै लगानीमा बाटो खनेर यस्तो नमुना काम गरेका हुन् । उनीहरुले आफ्नै लगानीमा तीन किलोमिटर बाटो खनेका छन् म्याग्दीको पिप्ले गाविसको अच्छेत गाउँका सर्वसाधारणले गाविसको वडा नं ५ नागबारीदेखि वडा नं ६ अच्छेत हुँदै वडा नं ७ कलेजाबाङ जोड्ने करिब तीन किलोमिटरको सडक निर्माण गरेका हुन् । अच्छेत गाउँका स्थानीयवासीको रु दुई लाख ५० हजारको लगानीबाट करिब तीन किलोमिटर

सडक निर्माण गरिएको सडक निर्माण समितिका अध्यक्ष इमबहादुर भण्डारीले जानकारी दिए । सडक निर्माणका लागि १८ घरधुरीले न्यूनतम रु पाँच हजारदेखि रु २० हजारसम्म लगानी गरेको अध्यक्ष भण्डारीले जानकारी दिए । स्थानीयवासीको शतप्रतिशत श्रमदानमा सडक निर्माण भएपछि अच्छेत र कलेजाबाङ गाउँका सर्वसाधारणलाई प्रत्यक्ष लाभ पुगेको समितिका सदस्य रेशम केसीले बताए । सडक निर्माणका लागि गाउँ परिषद्मा माग गरिएको बजेट प्राप्त भएमा ट्र्याक खोलिएको सो सडकको स्तरोन्नति गरिने निर्माण समितिले जनाएको छ