जसले फिर्ता गरे ट्याक्सीमा भेटाएको पाँच लाख

               काठमाडौं,असोज १५ – आफ्नो ट्याक्सीमा भेटिएको पाँच लाख रुपैयाँ एक चालकले धनीलाई फिर्ता गरेका छन् । बा१ज ११८५ नम्बरको ट्याक्सीका चालक दिनेश केसीले रकम फिर्ता गरेका हुन् । आफ्नो ट्याक्सीमा खसेको पैसा लुकाउन भन्दा धनीलाई बुझाउन हतार गरेर केसी बुझाउन सोझै ट्राफिक कार्यालय पुगेका थिए । ट्याक्सी चालकले पाँच लाख रुपैयाँको बिटो बोकेर जाँदा सुरुमा महानगरीय ट्राफिक महाशाखाका धेरै ट्राफिकले विश्वासै गरेनन् । पुतलीसडकबाट बानेश्वर जाने क्रममा एक यात्रुले छुटाएको रकम लिएर उनी कार्यालयमा पुगेका थिए । 

                 इमान्दार ट्याक्सी चालकको भूमिका निर्वाह गरेका केसीको इमानदारीको कदर जताजतै हुन थालेको छ । पैसा हराउने काभ्रेका अच्युत गौतमले उनलाई २० हजार नगद पुरस्कार दिएका छन् । यति मात्र होइन,उनलाई धन्यवाद दिन प्रहरी महानिरीक्षक उपेन्द्रकान्त अर्याल ट्राफिक महाशाखा नै पुगेका थिए । दुई सातापछिको प्रहरी दिवसमा १० हजार रुपैयाँ नगदसहित उनलाई सम्मान गर्ने निर्णय पनि महानिरीक्षक अर्यालले गरेका छन् । पुतलीसडकबाट बानेश्वर जाने क्रममा गौतमको पाँच लाख रुपैया छुटेको थियो । पुतलीसडकको सेन्चुरी बैंकबाट १९ लाख निकालेर बानेश्वरको एक बैंकमा जम्मा गर्न जाँदा उनले प्रयोग गरेको कमसल झोलाबाट पाँच लाख झरेको थियो । ट्याक्सी तथा अन्य सार्वजनिक यातायातमा हराएको तथा छुटेको सामान सर्वसाधारणले विरलै पाउँछन् । केही सवारी चालकले भने इमान्दारितापुर्वक

फिर्ता गर्ने गरेको उदाहरण केसी बनेका छन्,आजको नयाँ पत्रिका दैनिकमा खबर छ ।